மட்டுவில் அம்மன் கோவில் பங்குனித் திங்கள் அன்று காரில் வந்து தாலிக்கொடி அறுத்த கொள்ளைக்காரி பிடிபட்டது எப்படி?

யாழ்ப்பாணம், பன்றித்தலைச்சி அம்மன் கோவிலில் பக்தை ஒருவரின் தாலிக்கொடியை அறுத்த 58 வயதுடைய பெண் உள்ளிட்ட மூவர், கண்காணிப்பு கமரா (CCTV) உதவியுடன் அதிரடியாகக் கைது செய்யப்பட்டுள்ளனர்.

சாவகச்சேரி காவல்துறையினரால் முன்னெடுக்கப்பட்ட இந்த விசாரணையில், திருடப்பட்ட தாலிக்கொடி கிளிநொச்சி பகுதியில் உள்ள ஒரு கோவிலில் இருந்து மீட்கப்பட்டுள்ளது.

பன்றித்தலைச்சி அம்மன் கோவிலில் வழிபாட்டில் ஈடுபட்டிருந்த பெண்ணின் தாலிக்கொடி அறுத்தெடுக்கப்பட்டது குறித்து சாவகச்சேரி காவல் நிலையத்தில் முறைப்பாடு செய்யப்பட்டது.

ஆலயத்தில் பொருத்தப்பட்டிருந்த கண்காணிப்பு கமராக்களைச் சோதனையிட்டகாவல்துறையினா், தாலிக்கொடியை அறுத்த 58 வயதான பெண்ணை அடையாளம் கண்டனர்.

: தேடப்பட்டு வந்த அந்தப் பெண், நேற்று (2026 ஏப்ரல் 06, திங்கட்கிழமை) மீண்டும் அதே ஆலயத்திற்கு காரில் வந்தபோது, காவல்துறையினரால் அடையாளம் காணப்பட்டுக் கைது செய்யப்பட்டார். அவருடன் வந்த ஏனைய இருவர் மற்றும் அவர்கள் பயன்படுத்திய காரும் காவல்துறை வசப்படுத்தப்பட்டது.

விசாரணையின் போது, தான் திருடிய தாலிக்கொடியைக் கிளிநொச்சி பகுதியில் தான் வழிபாடு செய்யும் ஒரு கோவிலின் பிள்ளையார் சிலைக்குப் பின்னால் மறைத்து வைத்திருப்பதாக அந்தப் பெண் வாக்குமூலம் அளித்துள்ளார்.

சந்தேகநபரின் வாக்குமூலத்தின் அடிப்படையில் கிளிநொச்சிக்கு விரைந்த காவல்துறையினர், பிள்ளையார் சிலைக்குப் பின்னால் மறைத்து வைக்கப்பட்டிருந்த தாலிக்கொடியை மீட்டு வந்துள்ளனர். தற்போது கைது செய்யப்பட்ட மூவரிடமும் சாவகச்சேரி காவல்துறையினர் மேலதிக விசாரணைகளை முன்னெடுத்து வருகின்றனர்.