பிரித்தானியாவில் 46 வயதில் புடவை கட்டி ஓட தயாராகும் மது!

பிரித்தானியா – மென்செஸ்டரில் வசிக்கும் 46 வயதான மதுஸ்மிதா ஜேனா என்ற இந்திய வம்சாவளி ஆசிரியை, வரும் ஏப்ரல் 19, 2026 அன்று நடைபெறவுள்ள மென்செஸ்டர் மாரத்தான்’ போட்டியில் புடவை அணிந்து ஓடி கின்னஸ் உலக சாதனை படைக்கத் திட்டமிட்டுள்ளார்.

தற்போது புடவை அணிந்து அதிவேகமாக மரதன் கடந்த பெண்ணின் உலக சாதனை 3 மணி நேரம் 57 நிமிடங்கள் 7 வினாடிகளாக உள்ளது. இதனை முறியடிக்க மதுஸ்மிதா பந்தயத்தை 3 மணி நேரம் 50 நிமிடங்களுக்குள் முடிக்க இலக்கு வைத்துள்ளார்.

ஏற்கனவே பெர்லின் மரதன் உள்ளிட்ட மூன்று முழு மாரத்தான்களை புடவை அணிந்து வெற்றிகரமாக முடித்துள்ள மதுஸ்மிதா, பெண்களின் உடைக்கும் அவர்களின் திறமைக்கும் தடையிருக்கக் கூடாது என்பதை உலகுக்கு உணர்த்தவே இந்த முயற்சியை மேற்கொள்கிறார்.

இதற்காக தனது ஆறு கஜ புடவையை ஓடுவதற்கு வசதியாக கால்களில் சிக்காதவாறு பிரத்யேக முறையில் கட்டி பயிற்சியில் ஈடுபட்டு வருகிறார். மேலும், ஓடும்போது பாரம் தெரியாமல் இருக்க மிகவும் லேசான துணியால் ஆன புடவையையே அவர் பயன்படுத்துகிறார்.

தான் பணியாற்றும் ஹீட்டன் பள்ளியில் பயிலும் செரிப்ரல் பால்சி (Cerebral Palsy) பாதிப்புள்ள மாணவர்களுக்கு உதவும் வகையில், கண்களின் அசைவு மூலம் கணினியை இயக்கும் கருவி (Eye gaze device) வாங்க நிதி திரட்டுவதற்காகவும் இந்த ஓட்டத்தை அவர் அர்ப்பணித்துள்ளார்.

இங்கிலாந்தில் பிறந்து சவுதி அரேபியா மற்றும் துபாயில் வளர்ந்த மதுஸ்மிதா, “பெண்கள் தங்களுக்குப் பிடித்தமான, சௌகரியமான உடையில் எதையும் சாதிக்க முடியும்” என்று அனைத்து இனப் பெண்களுக்கும் ஊக்கமளிப்பதே தனது நோக்கம் என்று தெரிவித்துள்ளார்.