கொள்ளையடித்த நகையில் சொகுசு வாழ்க்கை: வீடு கட்டி, கார் வாங்கி வலம் வந்த கொள்ளைக் கும்பல்! – மட்டக்களப்பு நெல்லிக்காடு சம்பவத்தில் திடுக்கிடும் உண்மைகள்!

பெண்களின் தாலியில் சொகுசு வாழ்க்கை

மட்டக்களப்பு, நெல்லிக்காடு வயல் பகுதியில் பெண்களைக் கிணற்றில் வீசி நகைகளைக் கொள்ளையடித்த கும்பல், அந்தப் பணத்தில் மட்டக்களப்பில் மிக ஆடம்பரமான வாழ்க்கையை வாழ்ந்து வந்தமை பொலிஸ் விசாரணையில் அம்பலமாகியுள்ளது. கைதான தம்பதியினர் மற்றும் அவர்களது கூட்டாளிகள், அப்பாவிப் பெண்களின் தாலிக்கொடிகளை விற்றுப் பெற்ற பணத்தைக் கொண்டு ஒரு காரினையும், சொகுசு வீட்டினையும் கட்டியுள்ளனர் என்பது பொலிஸாரையே அதிர்ச்சியில் ஆழ்த்தியுள்ளது.

மீட்கப்பட்ட சொத்துக்கள் மற்றும் வாகனங்கள்

சந்தேகநபர்கள் இந்தக் குற்றச்செயல்களுக்காகப் பயன்படுத்திய இரண்டு முச்சக்கர வண்டிகள், ஒரு கார் மற்றும் மோட்டார் சைக்கிள் என்பனவற்றை பொலிஸார் தற்போது கைப்பற்றியுள்ளனர். குறிப்பாக, அண்மையில் கொள்ளையிடப்பட்ட தங்க ஆபரணங்களை விற்றுப் பெற்ற பணத்தைக் கொண்டே, இந்தக் கும்பல் கார் ஒன்றை கொள்வனவு செய்துள்ளமை உறுதிப்படுத்தப்பட்டுள்ளது.

நகைக்கடை உரிமையாளர்களும் சிக்கினர்

கொள்ளையடிக்கப்பட்ட நகைகளை வாங்கிய மற்றும் அவற்றை அடகு பிடித்துக்கொண்ட இரண்டு நகைக்கடை உரிமையாளர்களும் இந்தச் சம்பவம் தொடர்பாகக் கைது செய்யப்பட்டுள்ளனர். திருட்டு நகைகளை முறையற்ற விதத்தில் வாங்கி, இந்தக் கொள்ளைக்கும்பல் சொகுசு வாழ்க்கை வாழத் துணை நின்ற குற்றச்சாட்டின் கீழ் இவர்கள் மீது சட்ட நடவடிக்கை எடுக்கப்பட்டுள்ளது.

தொடர் கொள்ளைச் சம்பவங்களில் தொடர்பு

கைது செய்யப்பட்ட 5 பேரும் மட்டக்களப்பின் பல்வேறு பகுதிகளில் இடம்பெற்ற பல கொள்ளைச் சம்பவங்களுடன் தொடர்புடையவர்கள் என்பது விசாரணையில் தெரியவந்துள்ளது. ஒரே பாணியில் பெண்களைக் குறிவைத்து, அவர்களுக்கு மயக்க மருந்து கொடுத்துக் கொள்ளையிடுவதையே இவர்கள் ஒரு தொழிலாகவே செய்து வந்துள்ளனர்.

பொலிஸாரின் அதிரடி விசாரணை

கிழக்கு மாகாண விசேட குற்ற விசாரணைப் பிரிவினர் இந்தக் கும்பலிடம் தொடர்ந்து விசாரணைகளை முன்னெடுத்து வருகின்றனர். இதன் மூலம் மட்டக்களப்பில் தீர்க்கப்படாமல் உள்ள ஏனைய கொள்ளைச் சம்பவங்கள் மற்றும் மர்ம மரணங்கள் குறித்த உண்மைகள் விரைவில் வெளிச்சத்திற்கு வரும் என எதிர்பார்க்கப்படுகிறது.