மன்னார்க்குப் பெருமை: தமிழக மாநிலப் பெண்கள் வலைப்பந்தாட்ட அணியின் பயிற்சியாளராக கிரிஜா அருள்பிரகாசம் நியமனம்!

இலங்கையின் விளையாட்டு மற்றும் கல்வித்துறையில் ஆளுமைமிக்க ஒரு வீராங்கனையாகத் திகழ்ந்த மன்னார் மண்ணின் புதல்வி செல்வி கிரிஜா அருள்பிரகாசம், தமிழக மாநிலப் பெண்கள் வலைப்பந்தாட்ட அணியின் (Tamil Nadu State Women’s Netball Team) பயிற்சியாளராகத் தெரிவு செய்யப்பட்டுள்ளார்.

எல்லைகளைக் கடந்து, ஒரு இலங்கையராகத் தென்னிந்திய மாநில அணியொன்றின் தலைமைப் பொறுப்பை ஏற்றிருப்பது இலங்கை விளையாட்டுத் துறைக்குக் கிடைத்துள்ள மிகப்பெரிய கௌரவமாகும்.

கல்வியிலும் விளையாட்டிலும் ஒரு சரித்திர சாதனை

கிரிஜா அருள்பிரகாசம் அவர்கள் அண்மையில் நடைபெற்ற யாழ்ப்பாணப் பல்கலைக்கழகத்தின் 39-வது பட்டமளிப்பு விழாவில், ஊடகக் கற்கைகள் துறையில் ஆற்றிய அபார சாதனைகளுக்காக நான்கு தங்கப் பதக்கங்களையும் விருதுகளையும் வென்று சாதனை படைத்தவர் என்பது குறிப்பிடத்தக்கது:

பேராசிரியர் அழகையா துரைராஜா தங்கப் பதக்கம்: பீட மட்டத்தில் சகல துறைகளிலும் சிறந்த ஆற்றலை வெளிப்படுத்திய மாணவருக்கான விருது.

சகாதேவன் நிலக்சன் நினைவு விருது மற்றும் தங்கப் பதக்கம்: ஊடகக் கற்கைகள் துறையில் அதிகூடிய புள்ளிகளைப் (Highest OGPA) பெற்றமைக்காக.

‘ஆசுகவி கல்லடி வேலுப்பிள்ளை’ நினைவுத் தங்கப் பதக்கம்: அச்சு ஊடகத்துறையில் சிறந்த திறமையை வெளிப்படுத்தியமைக்காக.

முதலாம் வகுப்பு சித்தி: ஊடகக் கற்கைகள் துறையில் (Bachelor of Arts Hons) முதலாம் வகுப்பு கௌரவத்துடன் சித்தியடைந்தமை.

ஈழத்து மண்ணின் அடையாளம்

விளையாட்டுத் துறையில் யாழ்ப்பாணப் பல்கலைக்கழக ரீதியாகப் பல்வேறு சாதனைகளைப் படைத்த கிரிஜா, தற்போது தனது பயிற்சியாளர் பணியின் மூலம் தமிழகத்தின் விளையாட்டு அரங்கில் தடம் பதித்துள்ளார். மன்னாரிலிருந்து புறப்பட்டு, கல்வியிலும் விளையாட்டிலும் ஒரே நேரத்தில் சிகரம் தொட்ட இவரது வெற்றி, எதிர்கால இளம் வீராங்கனைகளுக்கு ஒரு பெரும் உத்வேகமாக அமைந்துள்ளது.

மன்னார் மண்ணின் இந்தச் சாதனைக் குரல், இன்று தமிழகத்தின் வலைப்பந்தாட்டக் களத்தில் ஓங்கி ஒலிக்கத் தொடங்கியுள்ளது.